deabruakteilatuetan
Deabruak
Info - Azken berriak
  • Lekeitio, jaiak

    Lekeitio, Plaza
    Data: 2010-IX-03. Lekeitio, Bizkaia.
    Taldeak: Itziarren Semeak, Deskontrol, deabruak teilatuetan, Gose.
    Aipagarria: 2010 udako kontzertuak.
     
    Duela bi urte ere, Lekeitioko festetan izan ginen jotzen. Orduan, Ken 7 taldekoak izan ziren oholtza-kideak. Eurek jo zuten lehenbizi. Plaza gainezka zen, gaztetxoak, helduak… Eta giro ederra. Ken 7 taldeak bere saioa amaitu eta bapatean plaza hutsik geratu zen.
     
    Erronka zaila genuen aurretik. Trasteak bere tokian ipini eta lehen akordeak jotzen hasi orduko, 300 bat lagun hurbildu zitzaizkigun. Bira honetako emanaldi gogoangarriena izan zela esan dezakegu.
     
    Duela hilabete batzuk, Lekeition jotzeko deia jaso genuen. Eta ez genuen zalantzarik egin. Ordukoa errepikatzeko irrikitan ginen.
     
    Hantze azaldu ginen, udako eguraldi zoragarria bidelagun. Bertako elkarte batean afaldu genuen talde eta teknikari denak. Eta hirugarrenak ginenez, jai-giroan murgildu ginen, tabernetan zein txosnetan. Baina txintxo demonio ibili ginen, eh!
     
    Kontzertua berezia izan zen, gainera. Bolada bateko azkena baitzen. Aritz kantariak eskerrak eman zizkien emanaldi hauetan guztietan bidelagun izan diren guztiei eta David zoriondu zuen; Iñigoren faltan, ondo baino hobeto kunplitu duelako baterijolearen tokian.

    Parrandan jarraitu genuen kontzertuaren ondoren. Eskerrak bertan lo egiteko tokia hartu genuela, bestela…   


  • Orereta, Madalenak

    Orereta, Maria Lezo gunea
    Data: 2010-VII-24. Orereta, Gipuzkoa.
    Taldeak: deabruak teilatuetan, Estricalla.
    Aipagarria: 2010 udako kontzertuak.

    Oreretan, toki askotan bezala, udal programaziotik at badira festa egiteko toki atseginak. Maria Lezo gunea izan daiteke horren adibide. Egitarau ofizialaz aparte, jai-giro ederra sortzea posible dela erakutsi digute Orereta aldean. Tabernari batzuk, autogestioan oinarrituz, egitarau alternatiboa osatu dute aurten. Do it yourself! Kalea itxi, eskenatokia duen kamioi bat ipini eta aurrera!

    Larunbata izanik, jendetza zebilen Maria Lezo gunean. Estricalla aritu zen lehenik, eta punk-rock dosi eder bat eskaini ziguten. Teknikari lanetan, Mikel Anestesia ikusi genuen, 1973 kamiseta jantzita, aupa Mikel! Kabenzotz!

    Gu hasi orduko, oso berandu zen eta lehen ilarako jendea pasa-pasa eginda zegoen. Probokazioei kasurik ez eta guk geureari eutsi genion.

    Oraingoan ere, gonbidatu berezi bat izan genuen oholtza gainean. "Erretzeko zerbait" bideoa gogoratzen? Bonbereneako gazteek grabatu zutena? Ba Aritzen papera egiten zuen gaztea igo zen kantu hori abestera. Bitxi geratu zen dueto-a.

    Kontzertua bezain ederra izan zen eman ziguten afaria, zelako maila Orereta aldean! Lerro hauen bidez, eskerrik asko antolaketan aritu ziren guztiei eta gu ikustera etorri zirenei!

    Lekeition izango dugu hurrengo hitzordua, irailaren 3an. Bitartean, ondo pasa!

  • Areta, jai eremua

    Areta, Laudio jai eremua
    Data: 2010-VII-23. Areta, Araba.
    Taldeak: deabruak teilatuetan, trikizio.
    Aipagarria: 2010 udako kontzertuak.
     
    Iazko udan Aritz kantaria gaixo jarri eta huts egin genuen. Aretakoak urtebete zain egoteko prest agertu ziren, eta hamabi hilabeteren ostean itzuli ginen emandako hitza betetzera. Estimatzekoa da antolatzaileek jaia berreskuratzeko egiten duten ahalegina.

    Bestalde, pozgarria da Aretakoek zer nolako atxekimendua adierazten dioten auzuneari. Haur, gazte eta heldu gehienak ere "Areta jaiak" kamiseta gorriak jantzita zebiltzan jai eremuan.

    aiaraldea.com guneko kideak ere agertu ziren, webgunerako elkarrizketa egin asmoz. Euskarazko komunikazioaren aldeko gune interesgarria da, merezi du webguneari bisita egitea.

    Eguraldia hozten hasi zenean musika egiten hasi ginen, kantak bata bestearen atzetik eskainiz. Ti-ta, hotzari aurre egin nahian bezala. Taulagainean argi eta ke muntaiarekin ezer gutxi ikusi genuen, eta esango genuke ikusleek ere tarteka ez zutela taulagainean inor nabaritzen. Badakizue, 80ko hamarkadan bogan jarri zen "ke efektua"...

    Naroa Amaiur taldeko kantaria igo zen gurekin "Gaur euria egin du" kantatzera, unerik politenetakoa izan zen ziurrenik.

    Jai batzordeko kideekin Kultur Etxean garagardoa edanez elkar agurtu genuen. Milesker eta beste bat arte. Eutsi goiari Areta!

  • Zarautz, Gaztetxea
    Zarautz, Putzuzulo gaztetxea
    Data: 2010-VII-16. Zarautz, Gipuzkoa.
    Taldeak: deabruak teilatuetan, mursego.
    Aipagarria: 2010 udako kontzertuak.
     
    Otsailean amaitu genuen “1973 bira” izeneko bira, Gasteizen Jimmy Jazz aretoan; Colemans+ taldeko jendilajea bidelagun.
    Jotzeko proposamen ugari jaso ditugunez, bi aldiz pentsatu gabe hainbat emanaldi lotu ditugu uda honetarako. Lehena, Zarautzen, Putzuzulon eskaini genuen.
    Egia esan, deabruon santutegi modukoan bilakatu da Putzuzulo. Azken diskoa plazaratu genuenetik hona, hiru udatan aritu gara zuzenean, eta hirutan Zarauzko gaztetxetik pasa gara.
    Beti bezala, lanerako jende prestua aurkitu genuen eta baita gau eder bat pasatzeko zaletu asko ere. Izerdi batean amaitu genuen beste behin ere.
    Argi indarra joan zen, gitarraren soka bat apurtu... Baina gorabeherak gorabehera, ederra izan zen Putzuzuloko festa. Kantuen artean, gure harridurarako, jendeak Inauterietako abestiak “eskaini” zizkigun. Hau da hau!
    Gure aurretik, Mursegoren proposamen bereziaz gozatzeko aukera izan genuen. Eta iazko azaroan Gernikako gaztetxean egin bezala, “Gaur euria egin du” kantua abestera igo zen gurekin Maite, Mursegoko artista handia.
    Zorionak beste behin ere, Putzuzulokoei. Jende zoragarria, toki zoragarrian.
  • Gasteiz, Jimmy Jazz aretoa

    Data: 2010-II-25. Gasteiz, Araba.
    Taldeak: deabruak teilatuetan, colemans+
    Aipagarria: “1973”  birako azken kontzertua.
     
    Bi urte pasatxo eman ditugu batetik bestera. Tarteka, etenaldi batzuk izan dira. Baina “1973”  diskoa 2007ko udazkenean plazaratu genuenetik hona, plaza, gaztetxe eta areto ugaritan aritu gara.

    Atsedenaldia eskatzen digu gorputzak; rock and roll gehiago buruak. Oreka-desoreka horretan, gorputzari kasu egitea pentsatu dugu. Baina oroitzapen ederra gogoan, berandu baino lehen indartsu bueltatzeko itxaropenarekin babestuko gara gure gotorlekuetan.
    Hasiera batean, urtarrileko bi saioen ondoren “gero arte!” esateko asmo sendoa genuen. Donostiako Doka eta Bilboko Kafe Antzokiko saioak ederrak izan ziren baina. Bidelagun zoragarriak izan genituen gainera, Colemans+ taldekoak.

    Egunkariaren aldeko sustengu taldekoek, ordea, Miarritzen antolatu zuten kontzertuan ia parte hartuko genuen deiadar egin ziguten eta guk ezin ezetz esan eta ederki asko pasa genuen gainera, Miarritzeko gaztetxean.

    Araba partean ere, beti harrera polita egiten digute eta esker ona azaltzeko edo, Gasteizen bertaratu ginen otsailaren 25ean, Jimmy Jazz aretoan.

    Colemans+ taldekoek hasi zuten kontzertua. Eman dituzten hiru saioen artean onena Gasteizkoa izan zela zioten, saio amaieran, taldeko lau kamikazeek. Peiremansen kantuak jendeak ondo gogoan ditu eta, abesti berriak ere, begionez hartu zituzten.

    Deabruen txanda izan zen ondoren. Azken hilabeteotako errepertorioari heldu zioten. Aritzek sasoi betean hartuko du atseden. David baterijolea, Arrutiren ordezkoa, inoiz baino askeago ibili zen. Kantuak ondo menderatzen ditu dagoeneko eta bere ukitu propioa ere eman zien hainbat kantuei.

    Toxic Twins bikiek aldiz, bateko lana dela besteko Colemans+ dela, goian hasi zuten emanaldia eta indarge amaitu zuten saioa. Baina beste behin ere, zoragarria izan zen gaua.

    Naroa Amaiur taldeko kantariak “Gaur euria egin du” abesti zuen, duetoan Aritzekin; gaueko une erromantikoena izan zen.

    Gorka Berri Txarrakek, letra eskuetan izan gabe ere, ondo menderatzen ditu Deabruen hainbat kantu eta bikain moldatu zen, beste behin ere, Sarriren poema eder batekin osatuta dagoen “Hau da ene ondasun guztia”  kantuan. 

    Jimmy Jazzekoak lan handia egin zuten eta hemendik eskerrak bidali nahi dizkiegu.
    Eta azkenik, kontzertu hauetan guztietan gure bidelagun izan diren musikari, teknikari, laguntzaile, lagun eta senide denei, ehun mila esker deabruen bizitza erraztu eta alaitzeagatik. Deabruak guarda gaitzala luzaroan…

  • Miarritze, Gaztetxea
    FITXA TEKNIKOA
    Data: 2010-II-06. Miarritze, Lapurdi.
    Taldeak: deabruak teilatuetan, Gose, Bizardunak, Anje Duhalde...
    Aipagarria: Egunkariaren aldeko ekitaldia.
     
    Kalderero eguna zen. Mozorro eguna, beraz, Tolosan. Eguraldia kaxkarra izanik ere, Tolosako giro polita atzean utzi eta Miarritzerako bidea hartu genuen. Urte hasieran, Donostiako Dokan jo genuen gau eder hartan iritsi zitzaigun Miarritzen aritzeko proposamena eta ezin ezetz esan. Zazpi urtez luzatu den bidegabekeria salatu eta auzipetuei elkartasuna adierazteko aukera majoa.
    Miarritzeko gaztetxera ailegatu orduko, giro ederra topatu genuen bertan. Anje Duhalde ari zen kantuan. Azken txanpan zen. “Goizeko” eta “Maita nazazu gutxiago, goza nazazu gehiago” kantuekin jendea abesten eta dantzan jarri zuen.
    Musikari handia Anje. Euskal Herrian rock-a egin duen lehenetarikoa. Errobiren garaiaz ari gara. 70eko hamarkadatik hona, jo eta su ibili da. Bidean topo egin dugu tarteka. Duela 13 urte edo, Euskal Astea egin zen La Habanan (Cuba) eta han aritu ginen elkarrekin kantuan. Oso ondo pasa genuen eta geroztik asko maite dugu Anje.
    Miarritzen, Imanol Murua kazetari zarauztarrarekin ere bi hitz egiteko aukera izan genuen. Arratsaldean hitzaldia eman zuen gaztetxean bertan. Egunkariko sortzaileetakoa, orain ere Berrian irakur ditzakegu bere analisiak eta, esan beharrik ez da, gu bere zaletu handiak gara.
    Euskal Herria Zuzenean jaialdian bezalaxe,  Miarritzen ere beroa ederra egin ziguten antolatzaileek eta bertaratu ziren zaletuek. Azken boladako errepertorioan oinarritu zen gure kontzertua. Bukaeran, karaoke modukoa egin genuen denok “Kantari goaz” abestiarekin eta aspaldiko partez, Peiremans+ taldearen bertsio batekin amaituko genuen kontzertua. Aritz juxtu zebilen eztarriarekin baina ederki asko moldatu zen.
    Gauzak bildu, Bizardunaken hainbat kantu entzun eta Tolosarako bidea hartu genuen. Lagunak zain genituen. Kalderero festaren azkenetan iritsi ginen baina berehala barneratu ginen jai-giroan. Inauteri usaia nagusi zen kalean. 
  • Bilbo, Kafe Antzokia

    FITXA TEKNIKOA
    Data: 2010-I-21. Bilbo, Bizkaia.
    Taldeak: deabruak teilatuetan, Colemans+.
    Aipagarria: Katedralean, kanpokoak nagusi!
     
    Dokakoa gau ederra izan zen. Colemansdarrak eta Deabruak primeran ibili ziren Donostia elurtuan. Jendez gainezka aretoa eta giro ederra kontzertuaren aurretik, kontzertuan bertan eta kontzertuaren ondoren ere!

    Ba zapore on horrekin abiatu ginen Bilboko Kafe Antzokira. Eta Dokakoaren pareko gaua izan zen Kafe Antzokikoa. Ostegun bat izateko, 300 lagun, bi taldeen artean giro ederra eta parranda latza saioaren amaieran: musika ona, garagardoak, umore ona…

    Colemans+ taldearentzat bigarren aukera izan zen Bilbokoa. Laupabost ensaiorekin igo ziren Dokako oholtza gainera. Bilbon, ordea, sendoago aritu ziren. Hasi berri guztiak bezala, fresko baina ilusioz gainezka! Peiremans+ taldearen itzala luzea da oraindik eta, Dokan bezala, Bilbon ere sumatu zenjendeak gogoko dituela kantu haiek. Aritz Deabruak igo zen Colemans+ekin kantatzera eta Deabruaken saioan, alderantziz, Gorka Necati izan zen Deabruekin batera inoizko “Hau da ene ondasun guztia” sentikorrena kantatzera.
     
    “Gaur euria egin du” kantuan, aldiz, Naroak (Amaiur, Sokaide) eta Aritzek Pinpinelarena egin zuten, bertaratu ziren guztien irribarrea eraginez.

    Eta Gorka Txamorro (Feos Pero Majos, Neguri Gorriak, Zein da Zein…) Zuentzat kantua abestera igo zen taula gainera, beti bezain indartsu eta ozen.

    Gainontzean, Aritz azkenaldian bezala, mikroa eskuan hartu eta jendartean aritu zen kantuan eta dantzan.
     
    Euskal Herriko agertokietan, Bilboko Kafe Antzokia katedrala dela diote batzuk. Urtarrilaren 21ean, kanpotarrak izan ziren garaile! Baina kontzertuaren amaieran ere! Musika ona, garagardoak, umore ona… Ordu txikiak arte luzatu zen parranda. Biharamunean, lanera joateko komeriak!
     
    Beste behin ere, eta ahaztu baino lehen, harrera bikaina egin ziguten Kafe Antzokikoek. Eta jendartean, azken bi urteotan antolaketan aritu den jende asko ikusi genuen, baita zaletu ugari ere… Mila esker denei, debruak guarda gaitzala luzaroan!
     

  • Donostia, Doka
    FITXA TEKNIKOA
    Data: 2010-I-08. Donostia, Gipuzkoa.
    Taldeak: deabruak teilatuetan, Colemans+.
    Aipagarria: Lagunarteko partida Dokako zelaian!
     
    Nahi eta ezin batean ibili gara azken bi urteotan Doka aretokoak eta Deabruok. Data eskaini, guk ezin jo. Baina azken txanpan izan bada ere, Donostiako Antigua auzoko areto eder horretan jotzeko modua izan dugu; “1973” diskoaren biraren amaieran izan bada ere.
     
    Zoragarria izan zen urtarrilaren 8ko gaua. Elurteari aurre eginez, jendetza bildu zen Dokan. Sarrera denak agortu eta festa eder batean bilakatu zen Deabruak Teilatuetan eta Colemans+ talde berriaren kontzertua. Hori bai, komeriak ondoren etorri ziren, etxera itzultzeko garaian. Errepideak gaizki, ezin autoa hartu eta taxirik ez hiriburuan.
     
    Azken kontzertuetan bezala, “1973” diskoko hainbat kantu jo genituen saioaren lehen zatian eta, amaieran, disko zaharretako hainbat ekarri genituen gogora. Eta azken kontzertuetan bezala, gonbidatu berezien laguntza izan genuen. “Ahituta” kantuan Joxi Ubeda igo zen taula gainera, bertaratu zirenen txaloen artean. “Gaur euria egin du” kantuan, aldiz, Naroa Gaintza Amaiur taldeko abeslariak duo ederra osatu zuen Aritz gure kantariarekin.  Entzuleen artean, Gorka Txamorro “Feos Pero Majos” kantaria aurkitu genuen eta, Andoaingo gaztetxean bezala, “Zuentzat” abestera igo zen gurekin.
     
    Gu baino lehen, Colemans+ taldeko anaiak aritu ziren. Joni eta Ima Deabruak, Karlos Aranzegi baterijolea eta Gorka Urbizuren proiektu berria eta puntuala. Lehen kontzertua eskaini zuten Dokan eta sendo eta txukun aritu ziren. Peiremansen kantuak gogora ekarri zituzten, lau abesti berri aurkeztu zituzten eta, Aritzekin batera, Bide Ertzeanen “Zu ikusi orduko” kantua abestu zuten. Aipatzekoa da Peiremansen kantuek itzal luzea utzi zutela. Dokan behintzat, entzuleak kantuan aritu ziren “Joan zinen”, Send flowers”, “Zuretzako hitz ederrak” abestiak eskaini zituztenean.
     
    Urtarrilaren 21ean, bigarrenez arituko dira Colemans+ eta Deabruak, Bilboko Kafe Antzokian.

  • Andoain, Gaztetxea
    FITXA TEKNIKOA
    Data: 2009-XII-12. Andoain, Gipuzkoa.
    Taldeak: deabruak teilatuetan, Meskaleroak Sound System.
    Aipagarria: Eurovision Andoainen!
     
    Bezperako zapore onarekin iritsi ginen Andoainera. Eguzkikoek AHTren kontrako jaialdia antolatu zuten gaztetxean eta gustura onartu genuen gonbitea. Gaztetxe zaharrean arituak ginen baina berrian jo gabe ginen (“berrian”, tira,  azken 13 urteko toki berean…).
     
    Puntual hasiko zela, gure azken kontzertua izango zela iragarria zegoen. Baina ia ordubeteko atzerapenez hasi ginen, gurea culpa, eta ez, ez da emango dugun azken kontzertua izango. Urtarrilean lagun eta plaza gehiago ditugulako esperoan (ikus agenda).
     
    Azken aldian, Gutagutarrak-en emanaldien itxura hartu dute gure kontzertuek. Bezperan, Gernikan, Mursego eta Naroa aritu ziren gurekin kantuan. Eta Andoainen, aldiz, beste hiru artista. Eurovision zirudien Andoaingo saioak. Bizkaitik Gorka 1 (Feos Pero Majos, Neguri Gorriak) “Zuentzat” kantatuz. Hori da hori indarra! Megafono bat du eztarriaren tokian! Gipuzkoatik Mitiko Joxi (Bukaera, Anima Vili, Tortura Sistematika) “Ahituta” abestuz. Irakasle onak izan ditugu, bai! Eta Nafarroatik Gorka 2 (Berri Txarrak, Peiremans+) “Zuretzako hitz ederrak” kantatuz. Oparitu digun kanta handienetako batean. Three points hirurentzat!
     
    Meskaleroak aritu ziren gero Dj lanetan. Martxa ederra jarriz, portzierto. Ajea bikoitza izan zen biharamunean, baina bertsolarien lezioarekin indarrak hartu genituen, luzarorako izan dadila!
     

  • Gernika, gaztetxea

    FITXA TEKNIKOA
    Data: 2009-XII-11. Gernika, Bizkaia.
    Taldeak: Mursego, deabruak teilatuetan.
    Aipagarria: Banpiro eta deabru gaua!
     
    Uztaila partean, Gernikan jotzekoak ginen. Baina Aritz lesionatu eta bertan behera utzi behar izan genuen saio hura. Gernikako Astra ezagutzen genuen lehendik, gaztetxea izandakoa. Han grabatu zen Berri Txarraken zuzenekoa eta emanaldi haren lekuko apartak izan ginen. Jende jatorra. Areto ederra. Arma fabrika zena, gaztetxe bihurturik. Ba al da iraultza handiagorik?

    Astra berregokitzen duten bitartean baina, Gernika erdigunean areto ederra atondu dute.
    Han azaldu ginen deabruak eta Mursego. Arrutk merkatua zabaltzen jarraitzen du munduan barrena (gaur Istanbulen, bihar Cannesen, etzi…) eta bien bitartean zarauztar baterijole batek betetzen du Arrutiren tokia, David izena duen mutil prestuak. Deabru eta banpiroak elkarrekin, beraz, Gernika partean. Zer edozer onik atera beharko, derrigorrez!
    Ordurako, Maite Arroitajauregik, Mursego ezizenean ezkutatzen den artista, Daniel Johnstonen bertsio bat egiteko ideia bota zigun eta hantxe igo ginen taula gainera, bertsolariak nola, Mursegoren saioan deabru eta banpiroei buruzko kantua abestera. A capella moment. Ona!

    Eta gure saioan, alderantziz, Maite izan zen “Gaur euria egin du” gurekin batera abestera igo zena. Entseatuta zegoela zirudien baina momentuko kontua izan zen, nahita ere ez zen hobeto aterako. Baina ez zen gaueko sorpresa bakarra izan. Hantxe zen beste artista handi bat, Naroa (Amaiur, Sokaide). Iazko udan edo ezagutu genuen kantari deustuarra. Lemoako festetan. Aritzek eta Naroak, Pimpinellaren gisan, “Gaur euria egin du” abestu zuten gau hartan. Horrelakorik ez du preziorik!

    Ba Gernikan, jendartean topatu genuen Naroa. “Zuentzat” kantua abestera atera genuen oholtza gainera eta aspaldiko “Zuentzat” hunkigarriena egin genuen elkarrekin. Ausardia eta talentua izateaz gain, kantari planta izugarria du. Rock and roll moment.

    Bapatekotasun horrek sortzen duen zirrara handia da gero.
    Alaitz eta Maider ere izan ziren, azken bisean “Kantari goaz” abesten. Baina boza kanbiatua zuten, orrazkera ere, neguko hotzak eraginda igual…

    Kontzertuaren ondoren, gustura geunden gaztetxean, garagardoak hartzen. Baina biharamunean Andoainen jo behar genuen, bide luzea etxeraino, eta damutu baino lehen ospa egitea erabaki genuen. Mursegoren giltzak azaldu zirenean!  Hori da hori estualdia…

  • Orio, plaza

    FITXA TEKNIKOA
    Data: 2009-10-31. Orio, Gipuzkoa
    Taldeak: Skasti, deabruak teilatuetan.
    Aipagarria: San Nikolas jaiak!
     
    Abendua izateko, oso giro bitxia topatu genuen Orio partean. Hego haizea harro zebilen. Neguaren atarian, Euskadi Tropikala nagusi! Hainbat eta hainbat, eguerditik parranda giroan zebiltzala sumatu genituen. Gu berriz, Durangoko Azokatik iritsi berriak, desabantaila handian ginen oriotar parranderoen ondoan.

    Soinu proba eta gero hasi ginen gu girotzen, Asier Gozategik Orion duen jantoki-ostatu ederrean. Bisitan etorri zitzaizkigun Karlos Bide Ertzean eta Imanol Goikoetxea gitar-jole urdiaindarra. Eta tertulia ederrean afaldu genuen.

    Kakiren faltan (Berlinen zegoen gau hartan, Banda Bassottiren zuzenekoa grabatzen), Fernan Irazoki soinu teknikaria etorri zen. Eta argitan, beste behin ere, Jorge Urcelay aritu zen.
     
    Plaza goraino zegoen baina asko parrandan zebiltzan, harat honat, baina zaletuenak eskenatokitik gertu izan genituen. Beste behin ere, ederki pasa genuen. Kantari goaz abestuz, toki utzi genien Skastikoei. A ze koadrila! Zortzi bat lagun eskenatokian, oso elegante jantziak, kantuan, dantzan… Giro ederra jarri zuten zarauztar gazteek.

    Guk tabernaz taberna jarraitu genuen tertulian. Udabe anai usurbildarrekin (San Pedroko arraunlari saiatua bat, Euskadi Irratiko esataria bestea) azken garagardoa hartu eta etxerako bidea hartu genuen. Hego haizea lagun!

  • Mallabia, plaza

    FITXA TEKNIKOA
    Data: 2009-10-31. Mallabia, Bizkaia
    Taldeak: Zea Mays, Lehiotikan, deabruak teilatuetan.
    Aipagarria: Ezer ez eta festa Mallabian!
     
    Irailean, Eskoriatzan Berri Txarraken disko aurkezpenean parte hartu genuenetik, zuzenean jo gabe geunden. Baina entsegu bakar batzuk egin eta taldea berriz ere martxan zen! Iñigo atzerrian, David arduratu zen danborrak egurtzeaz.
    Talde asko dauden jaialdietan, garrantzitsua izaten da puntualitatea. Horretan zalantzarik ez. Guk 22:00etan genuen hasteko ordua, juxtu Athletic-ek Ligako partida hasten zuen une berean! Eta Kaki, gure soinu-teknikaria amorratzen! Gero eta zurigorriago gure Kaki, jesouus!
    Gu, txintxo demonio, 22:00etarako taula gainean ginen eta aurrez aurre inor ez. Beno, Kaki amorratzen (uste dugu kaskoetan Athleticen partida entzuten ari zela, berak ezetz dioen arren; eta argi teknikari lanean, beti bezain fin, Jorge Urcelay).
    Baina zarata egiten hasi eta jendea hurbiltzen hasi zen. Aritzen dantzekin, ikusleak ere laster hasi ziren askatzen eta konturatu orduko giro polita sortu zen denen artean.
    Trasteak jaso, furgonetan sartu eta txosnarako bidea hartu genuen. Garagardo artean entzun genituen Lehiotikan taldekoen kantuak.   

  • Eskoriatza, Kiroldegia

    FITXA TEKNIKOA
    Data: 2009-09-19. Eskoriatza, Gipuzkoa
    Taldeak: Berri Txarrak, deabruak teilatuetan, Sinbiose
    Aipagarria: Aitzorrotz, Eskoriatzako Kultur Elkartea

    Iazko udan, Eskoriatzako Inkernu tabernan izan ginen jotzen. Rock and roll gau polita izan zen hura. Kontzertua bezain polita izan zen ondorena; Inkernukoekin eta bisitan etorri zitzaizkigun lagunekin izandako solasaldia. Eta hartutako garagardoak.

    Duela hilabete batzuk, Eskoriatzatik deitu ziguten berriro. Baina honakoan, kiroldegian jotzeko proposamena eginez. Berri Txarrak taldeak bira hasi behar zuela Eskoriatzako kiroldegian eta ia animatuko ote ginen.

    Kuriosoa da baina proposamen honek duela lau urteko arantza kentzeko aukera eskaintzen zigun. Izan ere, "Jaio.Musika.Hil" diskoa plazaratu zutenean, Berri Txarrak taldekoek eurekin jotzeko deitu ziguten, ilusioa egiten ziela gurekin batera Bonberenean jotzea. Baina orduan taldea geldirik genuen. Eta penaz, ezetz esan genien. Beraz, lau urte eta gero, Eskoriatzako lagunei esker, arantza hori kentzeko aukera izan dugu. Eta plazer handia izan da Eskoriatzara itzultzea, kiroldegian bildutako zaletuekin gure kantuak konpartitzea, Gorka Berri Txarrakekin Peiremans une batez berpiztea, Aritz Berrikoekin "Iraultza txikien asanblada" kantatzen ikusiz gozatzea...

    Giro polita sortu zen, sekulako parranda botatzeko horietako gaua zen. Ez ginen oso urruti ibili, hala ere. 

    Aupa Inkernuko jendilajea, ez etsi!

  • Portugalete, plaza

    FITXA TEKNIKOA
    Data: 2009-08-07. Portugalete, Bizkaia
    Taldeak: Zea Mays, Deabruak Teilatuetan
    Aipagarria: Herriko festak

    Maletak prest. Autoa zain. Oporrak hasteko garaia. Halaxe iritsi ginen Portugaletera. Nonbaitera abiatu aurreko sentsazio berezi horrekin barrenean. Kontzertua jo eta atsedenerako bidea hartuko genuen. Zea Maysekoak ere, Japoniara abiatzekotan ziren eta ilusioz gainezka sumatu genituen. Herrialde berri bat, entzulego berri bat deskubritzeko irrikitan.

    Txosnen ondoan jo genuen eta uda honetan herriz herri errepikatu den arazoa ahotan izan genuen. Ia herritik urrun zeuden horien argazkiak kenduko ote zituzten. Baina hantxe izan ziren kieto, kontzertuak iraun zuen bitartean bai behintzat.

    Bizkaiko alde horretan ez gara maiz izan eta oso harrera ona egin ziguten. Iñigo dagoeneko Istanbulen zen, baina hitza betetzen duen talde horietakoa garenez, beste behin ere David baterijole zarauztarrarekin izan ginen Portugaleten. “1973” diskoko kantuekin hasi baina aspaldiko doinuak abestuz amaitu genuen kontzertua.

    Lerro hauen bidez, Txanpa tabernakoei mila esker aunitz. Bertan aritzeko proposamena egin ziguten aspaldi eta guk ezin. Baina hala ere, kontzertuan bertan, aurretik eta ondoren ere, arretaz atenditu ziguten (nahiz eta kaferik ez zerbitzatu gaueko 22:30ean! Posible al da? Kar, kar).

  • Putzuzulo, Zarautz

    FITXA TEKNIKOA
    Data: 2009-08-01. Zarautz, Gipuzkoa
    Taldeak: Kokein, Deabruak Teilatuetan
    Aipagarria: Urtebetean, bigarrenez

    Iazko udan ere, biratxoa egin genuen Euskal Herrian barrena. Eta besteak beste, Zarautzen dagoen Putzuzulo gaztetxea ezagutzeko aukera izan genuen. Gure harridurarako, jendetza bildu zen eta iazko jaialdi politenetakoa izan zen.
    Aurtengo biran, bihotzak berriz ere Zarautzen jotzea eskatzen zigun. Baina buruak ezetz, bigarren aldiak ez direla hain gustagarriak izaten. Azkenean, bihotzari kasu egin eta hantxe azaldu ginen, Kokein taldearekin batera.
    Gaztetxeko jendea beti bezain adeitsu topatu genuen. Soinu froga eta gero, izugarrizko ekaitza izan zen baina gu Azken Portuko tabernetan babestu ginen, garagardoa lagun. Iaz han izan ginela eta aurten ez zela hainbeste jende etorriko, ika-mika horretan igaro genuen arratsaldea.
    Baina usteak erdia ustel. Afari makrobiotiko ederra dastatu eta gero, gin-tonic momentuan azaldu zen Karlos Aranzegi bisitan. Lehenago batu zitzaigun Unai “Hot”.
    Kokein izan zen lehena jotzen; lehen momentutik jende asko bildu zen Putzuzulon. Kontzertu indartsua eskaini zuten Kokeinekoek. Ordubeteko saioaren ondoren iritsi zen gure txanda. Hantxe ziren Tolosa, Eskoriatza, Eibar eta auskalo nongo zaletuak zain. Zarautzeko lagunak izan ziren, hala ere, lehenak giroa berotzen.
    Aurreko astean, bertan behera utzi genituen Gernika eta Laudioko saioak, Aritzek lantokian izandako lesio baten ondorioz. Beldur ginen, ia osaturik izango ote zen. Beste batzuetan baino apalago izan bazen ere, Aritzek dena eman zuen. Eta zaletuek gogotik eskertu zuten bere ahalegina.

  • Meskal taberna
    FITXA TEKNIKOA
    • Data: 2009-07-18. Herria: Tolosa, Gipuzkoa
    • Taldea: Toxic Twins & Crazy Cymbal
    • Partaideak: Ima Singermorning, Joni Rotondas eta Karlos Pausini

    KRONIKA

    2008an, Eskoriatzako kontzerturako bidean sortu zen Toxic Twins & Evil Cymbal taldea. 24 ordutan taldearen partaideak eta izena bera erabaki genituen lehen kontzertua eskaintzeko. Urtea igaro da, eta Toxic anaiak ez daude nonbait etxean geratzeko prest. Iñigo iaz, Karlos aurten, biak ala biak baterijole handiak. Eta biak bixki toxikoei laguntzeko oso egokiak. Sei hilabete atzera Leidorren eskainitako hainbat kantu moldatu zituzten hirukote modura. Bertsioetarako ere aukera izan zen: Quique Gonzalez, Sam Cooke eta, nola ez, deabruak!

    Gaua baino gehiago asteburuaz hitz egin behar. Bezperan, entsegua amaituta, gaua ordu txikiak arte luzatu zuten Meskalen eta Alegiko jaietan. Larunbatarekin nahikoa ez eta bezperan parranda egin behar! Bi egunez eutsi zioten. Kontzertua, zer esanik ez, dibertigarria izan zen. Eta ondorengoa ere bikaina! Laster arte, toxic twins itzultzeko gogoz daude!

  • Sanferminak, Iruņea

    FITXA TEKNIKOA
    Data: 2009-07-11. Iruñea, Nafarroa
    Taldeak: Deabruak Teilatuetan
    Aipagarria: Euskal eremua, Nafarroa Oinez gunea. Takonera.

    "Euskaltzaleen bilgune izan zen Takonera parkea Sanferminetan. Iaz deia jaso genuen eta ezin izan genuen agertu. Aurten berriro toki beretik iritsi zen deia eta atsegin handiz Iruñeara abiatu ginen. Larunbata izanda ere, zuzen eta bidean galdu gabe Takoneraraino iritsi ginen. Sekulako giroa ikusten zen Tres Reyes eremutik alde zaharrera. Jendetza zuriz jantzita, zapi gorriarekin. Emanaldira zarauztarrak, plaentxitarrak, bizkaitarrak... iruñearrik ba al zegoen galdera egin zuen aritzek eta ozen erantzun zuten iruinseme guztiek!

    Etxerako bidea hartu eta Andoainera iristean Ertzaintza zain genuen Sorabillako Mendiolan. Entzierroa ez, horri entzerrona deitzen zaio. Ertzaintzak geratu eta “–Buenas noches” esan zion gidariari. Gidariak, “–Bai, gabon!” erantzun. Eta horrela jarraitu zuen hizketaldiak:
    “–¿Que, venís de Sanfermines?”, ertzainak.
    “–Pués... sí”, gidariak.
    “–Y... ¿Habèis bebido?, ertzainak berriro.
    “–Pués, sí. Pero hace tiempo”, gidariak berriro.
    “–...”, ertzainak.
    “–...”, gidariak.
    “–Oye, nada, podéis seguir adelante. Buenas noches”, ertzainak agur esan zuen.
    “–Gabon!”, gidariak ere bai.

    Taldekideak elkar agurtu eta etxera, lotara. Bazen garaia eta. 

  • Euskal Herria Zuzenean, Heleta
    FITXA TEKNIKOA
    Data: 2009-07-04. Heleta, Behenafarroa
    Taldeak: Deabruak Teilatuetan + We are Standard + Che Sudaka + DesKontrol +....
    Aipagarria: Euskal Herria Zuzenean 2009.

    "Sanpedroko arraunlariak Aritzetan, haiek Bilbora abiatzeko busaren bila. Gu berriz, bestaldera, irteteko zorian. Sanpedrokoei emandako animoak haien eta gure mesederako izan ziren. Arratsalde-gau polit baten hasiera izan zelako. Hatortxun bezala, EHZ festibalean antolaketa ona eta lantalde prestua aurkitu genituen. Jaialdia hastea guri egokitu zitzaigun, eta hasteko orduan inor ez zegoen! 5 minutu beranduago taularatu ginen, eta ordurako, musikazale ugari pilatzen hasi zen gure inguruan. AC-DCren ordez, oraingoan Creedence Clearwater Revivalen doinuaz lagunduta igo ginen taulagainera. Sanferminak gainean ditugulako edo, zezenak Estafeta kalean gora bezala irten ginen. Atzean Inigoren ordezko David akuilurarekin, eta aurrean Ima-Joni Aritzek irekitzen zuen bideari jarraiki. Abiada bizian igaro zen saioa. Gainerakoan, Katti Pocheluren gidaritzapean, oso gustora izan ginen Heletan. Afaria, musikarien eremua, We are standard ikusten zegoen gau-giroa... Horrela bai, nahi adina kontzertu eman daitezke horrela! Plazer handia izan da EHZ jaialdiko partaide izatea.

  • Araba Euskaraz, Oion
    FITXA TEKNIKOA
    Data: 2009-06-21. Oion, Araba
    Taldeak: Deabruak Teilatuetan + bertako taldeak.
    Aipagarria: Araba Euskaraz 2009.

    "Bero izugarria pasako duzue, urtero hala izaten da Araba Euskarazen!”. Gure lagunmin batek hala esan zigun bezperan. Hala joan ginen, beroa pasatzeko beldurrez. Baina goiz jo behar genuen Oionen, 12:30ean. Tolosatik ordu eta erdira dagoenez, goizeko 9:00etan elkartu ginen Tolosako Hotel Orian. Hantxe zen Kaki gaua pasatzen. Bezperan, Tolosako San Joanetan aritu ginen eta lau orduko loa baino ez genuen egin. “Gure kapela makurra, beti tabernara gura”. Beraz, gosaldu eta Oion aldera, Errioxako mugan dagoen herrira.

    Antolatzaileen ongi etorria beroa izan zen baina giroa hotza lehen orduan. Gure lagunminak epelak entzun behar izan zituen. Baina egunak aurrera egin ahala, eguzkia bere lana egiten hasi zen eta azkenean gure lagunak arrazoi!

    Asteburuko hirugarren kontzertua zen eta nekeak jota ginen baina ederki pasa genuen. Lehen kantuetan, Joni eta Ima betaurrekoekin atera ohi dira. Hirugarren kantuan betaurrekoak kendu, lurrera bota, lente bat izorratu eta Aritzek jarri zituenean, ia barrez lehertu ziren ubedatarrak. Bi kantu pasa zituzten horrela, baina serio demonio jarri ziren ondoren eta saioa behar bezala bukatu ahal izan zuten.

    Berezia izan zen kontzertua. Azken orduan, lantokiz aldatu behar izan du Iñigo baterijoleak eta uztailean hitzartuta genituen kontzertuetan ez da gurekin izango. Bere ordez, David Gorospe zarauztar gaztea arituko da.

    Faltan botako dugu baina berriz libre denean, betiko deabruak taularatuko gara. Bien bitartean, emandako hitza bete eta David izango da bosgarren deabrua, beno, seigarrena, bosgarrena Kaki delako, gure soinu teknikari, psikologo, coach eta aholkularia!
    Nafarroako galsoro ederrei begira itzuli ginen etxera, nekatuta baina pozarren, han eta hemen egiten zaigun harrerarekin. 

  • Hatortxu Rock 10, Lakuntza

    FITXA TEKNIKOA
    Data: 2009-06-20. Hatortxu Rock, Lakuntza (Nafarroa).
    Aipagarria: Elkartasun jaialdiaren X. edizioa.

    Hilabete izan gara jo gabe eta asteburu bakar batean hirutan aritu gara zuzenean. Lehena, Hatortxukoa izan zen. Ilusioz gainezka joan ginen Lakuntza aldera. Furgonetan, lau deabruak, Fernan Irazoki laguntzailea eta monitoreetako teknikoa eta Kaki Arkarazo soinu teknikaria eta gure “coach” partikularra. Hizketaldi atseginean iritsi ginen Lakuntzara, inolako eragozpenik gabe….

    Iazko Hatortxu Rocken izan ginen lehen aldiz, eta berriz bueltatzeko gogo biziz ginen. Lagunak ditugu tartean, antolatzaile eta musika taldeen artean.
    19:15ean jo genuen, nahiz eta hasiera batean 20:30ean jo behar genuela iragarrita bazegoen ere. Baina gauez Tolosako San Joanetan jo behar genuen (ikus jaialdi horretako kronika) eta ordubete aurretatu genuen gure saioa. Horren ondorioz, askok gure saioa galdu zuten. Lastima. Izango dira gu ikusteko aukera gehiago, uztailean bertan, esate baterako (ikus agenda).

    Hainbat urte egin ditugu musikaren munduan eta areto, plaza eta jaialdi ugaritan hartu dugu parte. Eta zinez diogu antolaketa aldetik ezagutu dugun onenetakoa dela, inolako zalantzarik gabe. Zorionak lanean burubelarri aritu ziren antolatzaile, bolondres eta Hatortxu jaialdiko zaletu guztiei. Eta, nola ez, Gorka Urbizuri ere gurekin Peiremans-en bertsioa abestera igo zelako. It's rock!

  • Sanjuanak, Tolosa
    FITXA TEKNIKOA
    Data: 2009-06-20. Tolosa, Gipuzkoa.
    Taldeak: Deabruak Teilatuetan + Humus + Laket.
    Aipagarria: Koadrilen eguna.

    Lakuntzatik bueltan, sorterrira: Tolosara, alegia. Dagoeneko gutako inor ez da Tolosan bizi baina astebururo Meskalen bildu ohi gara lagunartean. Meskaletik Plaza Berriraino hainbat tabernatan ibiltzeko joera dugu. Ikastolako garai haietan Zabalarreta inguruan bizi ginen gu laurak eta Txaraman entseatzen genuen. Urte luzeko etenaldia eta gero, Txaramako lokala berreskuratu dugu orain egun gutxi. Han egin genuen Tolosako Koadrilen Eguneko kontzertuaren atariko entsegua. Urteak pasa ahala, jira eta bira askoren ondoren, Txaraman eta Tolosan geunden berriro. Sentsazio bitxiak gu laurontzat, asteburuan zehar behin baino gehiagotan aipatu genituenak.

    Hatortxutik Tolosara iritsi aurretik Irurako Sharen afaldu genuen, sekulako lagunak ditugu! Gurea bai zortea. Ardotan ito aurretik taulagainerako bidea hartu genuen. Tolosako koadrilen egunean, saio polita egin genuen. Jai giroan zeuden entzule ia denak eta horrek asko erraztu zuen gure saioa. Gogotsu atera eta gogotsu bukatu genuen. Ondoren, ezin etxera joan eta goiz jaiki behar genuen arren, Tolosako festa-giroan murgildu ginen goizeko ordu txikiak iritsi ziren arte. Deabruon artean ez da ohikoa, baina behingoz sorterrian gustura aritu ginela esan genezake.

  • Elgeta, Kafe Antzokia

    FITXA TEKNIKOA
    Data: 2009-05-23. Kafe Antzokia, Elgeta
    Taldeak: Deabruak Teilatuetan + Ama Say
    Aipagarria: 2009ko bigarren emanaldia

    KRONIKA:
    “This is a real place”, dio Ama Say taldeak kantu mitiko horietako batean. Afarian Gorka eta Iban Espaloianeko arduradunekin batera hizketan geundela, ordura arte Elgetan sekula izan ez zirenak (Inigo, Ama Sayko hainbat…) ahoa bete hortz zeuden aretoarekin, eta baita ardoarekin!

    Ama Sayko kantaria hurbildu zitzaigun lekuaren edertasunaz eta tratuaren bikaintasunaz hitz egiteko eta zera atera zitzaigun ahotik: “This is a real place!”. Hori esan zuen eta kantariak, berehala, “This magic real place!” erantzun zuen.

    Kontzertuan boom-boom! bombo kolpe bikoitzak ematen dio segida “This magic real place!” oihuari. Gasteiztik piska bat nekaturik iritsi ginen eta martxa hartzea kosta egin zitzaigun. Ikuslentzuleen laguntzarekin bidea zuzendu genuen, pozik egoteko moduko saioa eskaintzeraino. Ama Say taldeak jo zuen bigarren, taldeak erakutsi zuen soinua eta jarrera apartak izan ziren. Gau ikaragarri polita, orain hamalau urteko garai haiek gure baitan ziren. Ama Saykoak Tolosako gotorlekura etortzen zirenekoa. Eta gu oso gazte ginelarik, zenbat disfrutatzen genuen Carlos eta konpainiarekin!

  • Gasteiz, Arabatakada 2009
    FITXA TEKNIKOA
    • Data: 2009-05-22. Mendizorrotza, Gasteiz
    • Taldeak: Deabruak Teilatuetan + Vendetta + Txapelkunk + S.A. + ...
    • Aipagarria: 2009ko lehen emanaldia


    KRONIKA:

    Abenduan genion, Evil is alive and well. Urte erdia igaro da ia, eta zuzenean gabiltza berriro. Bizirik, eta onik ere. Azkena Rock egiten den eremuan bertan egin da Arabatakada. Antolakuntzari dagokionez, eta bietan musikari bezala izan garelako diogu, Arabataka bestearen pareko da. Behar bezala zaindu gaituzte hasieratik. Bestalde, plazerra izan da berriro lauak taulagainaren atzekaldean elkartzea. Gu laurak Kaki Arkarazorekin. Aritz bizi-bizi aritu da zuzenean, taulagainaren pareko hesia irekiz jendartera gerturatzeko. Eta bide batez ikusleak gugana are gehiago gertura zitezen. Ordua ez dugu bete musika egiten, talde askoren bilgune zelako Mendizorrotza. Taldeen kopurua ezer gutxi izan da han bildu den jendetzarekin. Agurtzen ari ginela, Zuentzat azken kantuarekin, pareko eskenatokiko burrunba hasi da eta, tira, guri errespetu gutxiko erabakia izan dela iruditu zaigu. Gurekiko eta gurekin dantzan ziren zaletuekiko. Guk besteekiko izan dugun errespetua baten batek gurekiko ez duelako izan. Tira, gertaera hori alde batera utzita, gustura egon gara saioa amaitu ondoren ere. Edanez, eta Gasteizko lagunartean. It's rock!

  • Bergara, Gaztetxea
    FITXA TEKNIKOA
    • Data: 2008-12-13. Bergarako gaztetxea, Gipuzkoa
    • Taldeak: Deabruak Teilatuetan + Fiachras
    • Aipagarria: 2008ko azken emanaldia

    KRONIKA:
    2009ko maiatzera bitarte saiorik eskaini gabe egongo garelako edo, inguruko lagunak gerturatu ziren gaztetxera. Ingurukoak eta beste asko! Gozamena izan zen guretzat. Oroimenean geratuko den egun horietakoa izan zen Bergarakoa. Eguerdirako iritsi ginen, bertan bazkaltzeko. Bezperan gertatu bezala, ez zen giro kalean. Hau hotza! Konturatu orduko iritsi zen aretora gerturatzeko ordua. Antolatzaile finak daude Gaztetxean, dena ondo bidean joan zen. Soinu froga eta afariaren artean Txapa irratian elkarrizketa eskaini genuen. Pol pol-en hartu genuen kafea, eta ordu erdiko tarte horretan jendez bete zen Gaztetxea. Dena ematera irten ginen, zuzeneko emanaldiaren errituala luzaroan errepikatuko ez zelako. Larrabetzun bezala, kanta asko bata bestearen atzetik lotu genituen. Errepertorioa osatu eta hiru kantu gehiagorekin amaiera eman genion 2008ko deabru kontzertuei. Plazerra izan da, 2009ko udaberria iristeko gogo biziarekin gaude. Evil is alive and well.

  • Larrabetzu, Gaztetxea
    FITXA TEKNIKOA
    • Data: 2008-12-12. Tokia: Larrabetzuko gaztetxea, Bizkaia
    • Taldeak: Deabruak Teilatuetan +Une
    • Aipagarria: 2008ko azkenaurreko emanaldia


    KRONIKA

    Negu giroa Larrabetzuko bidean, urteko azkenaurreko kontzertua eskaintzeko. Soinu froga egin aurretik poteoan aritu ginen herriguneko tabernetan, larrabetzuarrak bagina bezala. Kontzertua hasi aurretik Une-koekin gazteek eginiko afaria dastatu genuen Herrikon. Metro gutxira dago Gaztetxea. Behin barruan geundela, hotza gainetik kentzeko edo, hainbat kanta bata bestearen atzetik jarraian eskaini genituen. Giro polita sortu zen ikusleen eta gure artean. Aurrekaldean, ikusleen artean, Feos pero Majos taldeko kantaria ikusi genuen eta Aritzek Zuentzat kantua gurekin abestera dei egin zion. Gaueko politenetakoa izan zen, ezbairik gabe. Hori eta aspaldiko lagunekin egoteko aukera berria izatea. Gaztelumendi, Barcena irakaslea eta, bereziki, ondo zaindu gintuen Gotzon Barandiaran. Biharamunean Bergaran eskaini behar genuen saioa, eta beranduegi izan baino lehen, etxerako bidea hartu genuen. Euria, hotza eta giro lanbrotsua errepidean.

  • Hondarribi, Psilocybe aretoa
    FITXA TEKNIKOA
    • Data: 2008-11-15. Herria: Hondarribi, Gipuzkoa
    • Taldea: deabruak teilatuetan + inoiz ez
    • Aipagarria: Irun-Hondarribiko musika taldeen kolektiboa da Psilocybe.

    KRONIKA
    Aspalditik dago martxan Psilocybe kolektiboa, Irun eta Hondarribia aldeko musika taldeak biltzen dituen elkartea. Dut, Lif eta talde hauen bidez izan genuen lehen aldiz Psilocyberen berri. Urritik hona, instituzioen laguntzari esker, entseatzeko lokal berrituak eta kontzertuak eskaintzeko areto eder bat kudeatzen ditu kolektibo honek. Hondarribiara iritsi ginenean, zur eta lur geratu ginen. Eraikin ederra, elegantea eta eredugarria. Estudio txiki bat ere bada, bertako taldeek euren grabazioak egin ditzaten. Atsegina ikustera joateko, eta atsegina jo behar duenarentzat ere, Kuriosoak eta ikusgarriak, kamerinoak.

    Inoiz Ez taldearekin aritu ginen. Gazteak gogor datoz eta ilusio handiarekin ikusi genituen oholtza gainean. Saio polita eskaini zuten. Ondoren, deabruon txanda izan zen. Aritz ez zen geldi egon ezta jende artean ziren batzuk ere. Taula gainera igo zenik ere izan zen… Festa ederra izan zen seinale.

    Iñigo ere serio demonio aritu zen baterian eta indar denak xahutu arte aritu zen jo eta su. Garagardo artean, Zura taldeko kideekin aritu ginen hizketan (Kiribil diskoa atera berri dute, brasileiro kutsua du, oso ona). Eta aspaldiko lagunak besarkatzeko aukera ere izan genuen. Hantxe ziren Dut, Lif, Bertso Hop dendako jendea… Eta hainbat deabruzale, horien artean, Ortzi. Berak ateratako argazkiak jarri ditugu orriotan ikusgai.

  • Gasteiz, Piztu Gasteiz!
    FITXA TEKNIKOA
    • Data: 2008-10-11. Herria: Gasteiz, Araba
    • Taldea: deabruak teilatuetan + dr.deseo + green valley + indarrap + piztu punka
    • Aipagarria: Hala Bedi irratiaren eta Gaztetxearen urteurrenak.

    KRONIKA

    Bonberenea Sutan jaialdiaren moduko giroa aurkitu genuen Gasteizen. Hiria izanik, egitasmoa bera mardulagoa zen. Jende kopurua ikusita, pozarren egon daitezke lanean aritu ziren irratiko eta gaztetxeko ehunka bolondresak. Eta gu ere bai, noski. Pozarren, eskerronez eta harro gaude ekimen horren partaide izateaz. Green Valley taldeak saioa amaituta, jendetza zain zegoela, denbora gutxian taulagaineko prestaketa lanak egin behar izan genituen. Igo ginen eta emanaldian zehar pozarren jaso genuen entzulegoaren laguntza hainbat kantuetan. Saioa iluntzean izanik, hara iritsi aurretik, goiz samar itzultzeko asmotan geunden. Baina halakorik egitea zegoen giroa ikusita! 70n afaldu eta ondoren Aldapa, Gaztetxea... alde zaharrean gauak ertz ugari ditu. Gasteizko gaua bai ederra! 
  • Irura, Kilometroak
    FITXA TEKNIKOA
    • Data: 2008-10-05. Herria: Irura, Gipuzkoa
    • Taldea: deabruak teilatuetan + zea mays + betagarri + obrint pas + trikizio
    • Aipagarria: Kilometroak jaia. ARGAZKI BILDUMA (©Unai Perea)

    KRONIKA

    Kilolitroak arean, barka, 2. eremuan eskaini genuen saioa. Ez dira rockandrollerako orduak 12:30ak! Eta pentsa Zea Maysentzat, 10:30tan! Bada, gaztetxo askorentzat antza denez ordu egokia zen. Goizean goizetik aritu ziren taldeei harrera beroa egin zieten. Eskerrak! Hasi orduko Imak kitarra soka hautsi zuen eta hori dela eta lekuz kanpo bezala aritu ginen hasieran. Baina, oro har, oroitzapen polita gordeko dugu. Kantari goaz kantuan Aiora Pirritx eta antolatzaile taldeko Txetxo aritu ziren kantuan. Bestalde, bideoan agertzen diren gaztetxoei esker konturatu gara Erretzeko zerbait kantua ezagun egin dela teenager-en artean. Peiremans+ ere gogoko dutela ondo baino hobeto ikusi genuen. Gauzak bildu eta DYA lan eta lan zebilela, Kilometro batzuk egitea erabaki genuen. Karlos Aranzegi lagun handiarekin batera Anoetan Desordutan, Tapia, Amaiur ikusten izan ginen. Iluntzerako kilometroak bezainbesteko litroak generamatzan gainean... Gaur egungo gazteak!
  • Ondarru, Kafe Antzokia
    FITXA TEKNIKOA
    • Data: 2008-10-04. Herria: Ondarru, Bizkaia
    • Taldea: deabruak teilatuetan + desoreka
    • Aipagarria: Kafe Antzokia, udazkeneko musika programazioaren hasiera

    KRONIKA

    Iraileko saioak igarota, hurrengo geldialdia herri kuttunean eta toki ederrean genuen, Ondarruko Kafe Antzokian. Hainbeste poz eman digun herrian, makina bider izan baikara jaietan. Aspaldian. Musikazaleentzat, tenplu modukoa da. Hau guztia esanda, gogo biziz gerturatu ginen aretora. Gure aurretik Desoreka aritu zen, hotz samar zegeon giroa baina hala eta guztiz ere saio txukuna egin zuten. R'n'roll danmation AC/DCren kantua etxean laga genuen eta Creedence Clearwater Revivalekin eman genion hasiera saioari. Hasiera bizia izan zen, hainbat kanta jarraian eskainiz eta soinu frogan baino askoz hobeago aritu ginen. Bildu zen jendea gustura geratu zelakoan gaude, guk bederen saio bakoitzean ahalik eta gehien disfrutatzen saiatzen gara. Jakin eta badakigu geroz eta saio gutxiago geratzen zaizkigula. Ez genuen Ondarrun ohiko den bezala gaua gehiegi luzatu. Goizean goiz jaiki behar genuen Iruran egoteko.
  • Bonberenea sutan, jaialdia
    FITXA TEKNIKOA
    • Data: 2008-09-13. Herria: Tolosa, Gipuzkoa
    • Taldea: deabruak teilatuetan + inoreneroni + willis drummonds + delorean + lisabö
    • Aipagarria: Bonberena sutan jaialdia

    KRONIKA

    Eguraldia ez zen Bonbereneako piromanoez fio eta horregatik asteburu osoan serio demonio egon zen, zaindari lanetan. Nolanahi ere, bere oniritiza izan zuen jaialdiak. Alegia, ez zuela inork zapuztu jaialdia. Taulagainaren bestaldetik esan genezake talde guztiek dena eman zutela. Ikusleena ere meritu handikoa. Eta antolatzaileez zer esan? Bada, langile piromano asko zegoela eta hori dela sekretua jaialdia bikain irteteko: gogoz egindako lana. Hau esanda, goazen gure herrian eskaini genuen jaialdiaz hitz egitera. Ez zaigu erraza egiten sorterrian aritzea. Baina aipatutako guztiarekin ezin saio zatarra egin! Lagun asko igo zen gainera taulagainera: Bideoan agertzen diren gure "dobleak", Bonberenako piromanoak, Joxi Bukaera, Gorka Urbizu Peiremans... festa polita, bai horixe! Goizalderarte luzatu zen. Ordu txikietan denak elkarrekin zeuden Bonberenean: musikariak, antolatzaileak, musikazaleak, piromanoak eta banpiroak... Eskerrak eguraldia zaindari lanetan zegoen, bestela Tolosak su hartuko zuen! 
  • Ugao, jaiak

    FITXA TEKNIKOA

    • Data: 2008-09-12. Herria: Ugao, Bizkaia
    • Taldea: deabruak teilatuetan + habeas corpus + feos pero majos
    • Aipagarria: Jaiak

    KRONIKA

    Giro petrala izan genuen hitzordua ipini genuen unetik bertatik. Euria, hotza... akabo uda! Goio Ramos ugaotarrak alaitu gintuen arratsaldea eta kontzertua. Argazkilari lanetan eta Kantari abestiaren korista paperean aritu zen deabruakentzat (Argazkiak webgune honetan bertan ikusgai izango dira laster).

    Eguraldia dela eta ezin zuzeneko beroa eskaini, distantzia halabeharrez sortzen baita ikusle-musikari artean euria tarteko denean. Nola edo hala aurrera egin genuen disko berriko eta aspaldiko kantak eskainiz. Habeas Corpus taldeko lagunekin egoteko aukera gutxi izan genuen eta Feos pero majos taldea ikusi gabe alde egin genuen. Pena handirekin, baina hurrengo eguneko kontzerturako soinu froga egiteko hitzordua eguerdian ipini ziguten eta han txukun aritzeko bezperan ezin gautxorien modura ibili. Beti arte!

  • Lekeitio, jaiak
    FITXA TEKNIKOA
    • Data: 2008-09-06. Herria: Lekeitio, Bizkaia
    • Taldea: deabruak teilatuetan + ken zazpi
    • Aipagarria: Jaiak, Plaza

    KRONIKA

    Elorrioko jaietan ezagun piloa topatu genuen, Lekeitioko emanaldiaren hasieran ez bezala. Ez zen inor plazan! Eta hara, emanaldiarekin hasi eta harri azpitik edo baina agertu ziren 300-400 inguru r'n'roll doinuak entzuteko gogoz. Tartean, nabaria zen deabruzale asko zegoela. Eta horrek gugan efektu biderkatzailea izan zuen. Gu geu gustura geratu ginen egindako saioarekin, beste zenbait emanaldietan baina askoz gehiago. Eta hori, bereziki, zaletuek eskaini ziguten harrerari esker! Asmatu genuen bertan lotan geratzearekin. Txosnatan batekin eta bestekin hizketan giro ederrean aritu ginen. Eta goizaldera jaiki eta portu aldean eta Tia Franen pintxo ederrak hartu genituen. Inigo Madril aldera irten zen eta besteak teilatutik teilatura ibili ginen: Elgetako espaloian bazkaltzen eta musika ipintzen, arratsaldean Meskalera iritsi bitarte. Asteburu ederra. Lekeitiokoa, luzaroan gordeko dugun gaua izanen da.

  • Elorrio, jaiak

    FITXA TEKNIKOA

    • Data: 2008-09-05. Herria: Elorrio, Bizkaia
    • Taldea: deabruak teilatuetan + sorkun & lehendakariordeak
    • Aipagarria: Jaiak, Txosnak

    KRONIKA

    Elorriora itzultzeko gogoz ginen. Maite dugun plaza da Elorriokoa. Ateneoa, Gaztetxea, Parra... hainbat proposamen jaso genituen neguan, baina ezin kunplitu. Jaietan ordea posible izan da gure nahia asebetetzea.

    Elorrio jotzea, etxean aritzea bezala da. Aspaldiko lagunak saludatu, Non demontre eta Logelako jendilajea, Txaber, mitiko Papi... Elkarte batean bapo afaldu eta gero ekin genion lanari. Gustura, gogotsu eta indarrez. Kuriosoa kontzertu erdian pasa zitzaiguna, "Gaur euria egin du" jotzen hasi eta euri hasi zuen gogotik, lastima. Hala ere, jendea ez zen kikildu eta eskerrak! Jai giro ederrean gauari eman genion segida garagardo artean. Plazer handia!

  • Lemoa, Eskolak

    FITXA TEKNIKOA

    • Data: 2008-08-02. Herria: Lemoa, Bikaia
    • Taldea: deabruak teilatuetan + amaiur
    • Aipagarria: Jaiak

    KRONIKA

    Egun gutxitan zazpi kontzertu pilatu ziren gure agendan eta Lemoakoa bira txiki horren azken geldialdia izan zen. Bost egunez jarraian musika egiten jardun eta gero, eskertzekoa da Lemoara iristea. Musikaria ondo baino hobeto zaintzen baitute. Atseden hartzeko gunea, jateko eta edateko kamerinoak (dutxa eta guzti), zuzeneko ona eskaintzeko baldintza tekniko guztiak... Arin joan zen arratsaldea eta horrelakoetan zuzenekoari gogotsu heltzen diogu. Zorionak, alde batetik, Jai Batzordeari! Gurekin batera gau horretan kantuan aritu ziren Amaiur taldekoak. Naroa gurekin igo zen taulagainera, "Gaur euria egin du" kantua abestera. Pimpìnella moment izan zen, gure harridurarako batak eta besteak, Aritzek eta Naroak, antzerkigintzarako dohainak dituztela ikusi genuen. Udako jaietan musika onarekin gozatu nahi izanez gero, talde aparta da Amaiur. Txosnatan tragotxo batzuk hartu eta etxerako bidea hartu genuen. Pozik egindakoarekin, triste amaiera iritsi zelako. Hurrengo asteetako planari eusteko gogotsu gaude dagoeneko. Irailean, zuzeneko gehiago Elorrion, Ugaon, Tolosan...
  • Berastegi, Urepele

    FITXA TEKNIKOA

    • Data: 2008-08-01. Herria: Berastegi, Gipuzkoa
    • Taldea: deabruak teilatuetan 
    • Aipagarria: Gazte Elkartea

    KRONIKA

    Nola aldatzen diren gauzak herri batetik bestera, kontzertu batetik bestera. Algortan soinua, hotsa eta anabasa topatu genuen eta, biharamunean, Berastegin lasaitasuna eta denbora geldoago doan sentsazioa. Algortan ez bezala Berastegira iritsi eta soinu ekipoa prest zegoen, gu iristeko zain. Esandakoa, aldaketa paregabea egun batetik bestera. Ikuslegoari begira antzeko izan daitezke biak, gogo berdinarekin saiatzen garelako musika egiten baina emanaldiaren aurreko lanak prestatzeko askoz eramangarriagoa da Berastegiko plana. Ilunpean, argi gutxirekin, eskaini genuen saioa. Jotzen ari garenontzat zailtasun bat bada batzuetan baina orohar txukun aritu ginela esan genezake. Kontzertua baino lehen Aloñak laguntza handia eskaini zigun eta egunean bertan gazte elkarteko eragile lanetan dabilen Aritzek. Berastegiko gazte asko bildu zen emanaldira, inguruko herrietakoak ere bai eta, nola ez, gure inguruko lagunak. Musikari handiak, guztiak: Imanol Goikoetxea, Karlos Aranzegi, Joserra Senperena, Jone, kantatzera atera genuen Joxi Ubeda... Plazerra gurea da. Ez genituzke ahaztu nahi tolosaldetik etorritako lagun guztiak. Nafarroa Oinezen kantua entzuten amaitu genuen Berastegiko egonaldia. Egindako lagun berriak agurtu eta etxerako bidea hartu genuen. Lemoan dago udako azken geltokia.
  • Algorta, plaza

    FITXA TEKNIKOA

    • Data: 2008-07-31. Herria: Algorta, Bikaia
    • Taldea: deabruak teilatuetan + no drama + sutagar
    • Aipagarria: Jaiak

    KRONIKA

    Bezperan Toxic Twins & Evil Cymbal taldeko partaideok (Ima, Inigo eta Joni) kostata alde egin genuen Meskaletik. Bero izugarriarekin abiatu ginen ibilgailuz beteriko A8 errepidean, Algortako norabidean. Plazara iritsi eta metro gutxira txosnak, koadrilen jokoak eta eskenatokiko musika hotsak aurkitu genituen. Soinua, hotsak, anabasa...horixe da jaia! Soinu froga desastre hutsa izan zen hiru ordu pasatxo egon behar izan baikenuen arrazoi bat eta beste tarteko. Afaldu eta San Inazio eguna ospatu genuen, Iñigok ekarritako txanpainarekin eta Kakik ekarritako pastekin. Biba zuek, ez Inazio! Egiari zor, gu geu gure buruarekin gusturago aritu izan gara beste saio batzuetan. Zer egingo diogu bada! Nolanahi ere ikusleak gustura izan zirela esateko moduan gaude. Gau horretan mutilen kamisetarik ez genuen saltzeko eta neska bat pozarren joan zen Aritzek izerdiz beteriko kamiseta oparitu zionean... Esandakoa, lagunak pilatzen goazela. Udako biratxoaren azken txanpa zain dugu.
  • Meskal taberna

    FITXA TEKNIKOA

    • Data: 2008-07-30. Herria: Tolosa, Gipuzkoa
    • Taldea: Toxic Twins & Evil Cymbal
    • Partaideak: Ima Singermorning, Joni Rotondas eta Iñigo Wanted

    KRONIKA

    Eskoriatzako bidean sortu zen Toxic Twins & Evil Cymbal taldea. 24 ordutan taldearen partaideak eta izena bera erabaki genituen lehen kontzertua eskaintzeko. Ez da abiapuntu txarra. Eskoriatzako eta Algortako emanaldien artean zegoen gauean ezin etxean geratu eta zer egin behar genuen ba! Betiko bilduleku izan den Meskal tabernan saioa eskaini genuen. Kakik eta Pintzak entseatzeko Garate gure eskuetan utzi zuten, Txetxok eta Idoiak afari ederra eskaini ziguten Iruran... hori da hori luxua! Saiatu ginen kontzertu duina eskaintzen, gure lehen emanaldian. Bildutakoen harrera ikusita, ez zela hasiera txarra izan esan genezake. Egia esan, ia denak lagun genituen beraz marka litzateke harrera zatarra jasotzea.... Aritz gabe moldatu ginen deabruen kantuak eskaintzen. Hori nahikoa ez eta, tartean, Imaren kantu berri bat eta hainbat bertsio: Balerdi Balerdi, Bide ertzean, Peiremans+... Amaitzeko, La Bambaren bertsio erdipurdikakoa. Horrela amaitu zen gauaren lehen zatia, bigarren zatia ere gozagarria izan zen. Garagardoa eskuetan Jakob Dylan, Pereza, Michael Jackson... abestuz eman genuen gaua. Oheratu aurretik, Meskal tabernakoei esker ona adierazi genien Iñigo furgonetan nola edo hala sartzen genuen bitartean.
  • Inkernu taberna
    FITXA TEKNIKOA
    • Data: 2008-07-29. Herria: Eskoriatza, Gipuzkoa
    • Taldeak: deabruak teilatuetan

    KRONIKA

    Egunean bertan ezagutu genituen lagunen artean kantari aritu ginen. Plazer handia Iñaki, Andoni, Lukas Priest eta tabernako jendearekin solasean aritzea. Aritz ahotsa hartuta zegoela iritsi zen Inkernura. Gure beldurrik handiena egun hauetan ahotsa behar bezala zaintzea da eta oztopoak ez dira gutxi: Adurtzako haize zakarra, tabernetako eta hoteletako haize girotua, Zornotzako soinu frogan pairatu genuen eguzki-izpi bortitzak, nonahi guk nahi ez baina eskaintzen dizkiguten zerbeza hotzak... Nolanahi ere emanaldian zehar ahotsa ondo entzun zen eta uste baino hobeto aritu ginen. Taberna txikia, eskasa ez ordea! Gogotsu aritu ginen eta eskertzekoa da etxekoen eta lagunen bisita (Olaia, Patxi Gaztelumendi...). Gau giro ederra zegoen eta kanpoaldean tertulian aritu ginen Andoni DJ SS-77rekin. Musikarik ez zuen eskaini baina Juan Carlos "Porque no te callas! eta Josu Jon "Petronor" hizpide izan zituen, gu guztion gozamenerako. Bidean aurrera goaz 1973 diskoaren aurkezpenarekin. Lagunak pilatzen goaz Zarautzen, Lizarran, Eskoriatzan... eskerrak lagunak diren bestela Blues Brothersen filmean bezala amaituko dugu: furgonetan ihesean eta atzean etsaiez beteriko kotxe soka luzea!
  • Zornotza, txosnak
    FITXA TEKNIKOA
    2008-07-27. Herria: Zornotza
    Taldea: deabruak teilatuetan + Xau

    KRONIKA
    Bezperan Lizarran kontzertua eskaini genuen eta ordu txikiak arte geratu ginen bertakoekin. Esnatu eta Lizarran zeharkaldia egin genuen, Andoainera bazkaltzera joan aurretik. Giro ederra, eguzkitsua eta atsegina utzi genuen Lizarran. Aritz, Ima eta Inigo lo zeudela Zornotzara gerturatzen hasi ginen. Sekulako azpiegitura dago txosnagunean, taulagaina lehen mailakoa da, soinu ekipoa ere bai. Soinu froga egin ondoren garagardo batzuk hartzen aritu ginen, azken tabernan Coldplay taldearen zuzeneko kantuak telebistan ikusten aritu ginen bitartean. Ikararen gaua edota Bizirik kantuak berreskuratu genituen emanaldirako. Ziurrenik Aritzen ahotsa gehien nabarmendu zen saioa izan zen, Ima piska bat petralduta zegoen Marshall anplia ez zegoelako bere onenean. Eta Inigo berriz, taulagainetik jaitsi eta gauza bakarra zuen buruan: ibilgailuan sartzea etxerako bidea hartzeko. Hiru egun jarraian aritu gara eta azkenean nekea pilatuz doa. Astelehena, atseden eguna. Asteartea iritsi zain gaude, Eskoriatzara joateko.
  • Lizarra, Zezen plaza
    FITXA TEKNIKOA
    2008-07-26. Herria: Zezen plaza, Lizarra
    Taldea: deabruak teilatuetan + Gatibu + Ultimos Reyes
    Aipatzekoa: Disko berriaren aurkezpena Lizarran
    KRONIKA
    Zezen plazak zertarako daude bada? Kontzertuetarako, noski!! Utikan zezenketak, horixe gure aspaldiko aldarrikapena. Eta aspaldikoa ere Gasteizko, Lizarrako eta Tolosako haurrekin begirale bezala aritu ginenekoa. 1991-1992 urteetan Lekeition eta Burgin aritz, ima eta joni haurren monitore edo begirale lanetan jardun ginen, horiek bai aspaldiko garaiak! Dagoeneko hau guztia zertara datorren galdezka arituko zarete. Lizarran orain 17 urteko haur horiek topatu genituen kontzertuan! Dagoeneko gizon eta emakume dira. Amaia, Nikol eta konpainia, biba zuek! Zirraragarria izan zen zuekin berriro topatzea, guk baino memoria hobea duzuela ere argi geratu zen! Muxuak eta beste bat arte. Gainerantzean emanaldia polita izan zen, bezperakoarekin alderatuta oso ezberdina. Gau izartsuaren babesean aritu ginen, gustora. Nolanahi ere, saioa amaitu ondorengo garagardoak hartzen gustorago. Egin ditugun lagun guztiei besarkada bana, bereziki Hasierri. Lizarran zeozer lo egin eta Zornotzara abiatu gara.
  • Zarautz, Putzuzulo
    FITXA TEKNIKOA
    2008-07-25. Herria: Putzuzulo gaztetxea, Zarautz
    Taldea: deabruak teilatuetan
    Aipatzekoa: Disko berriaren aurkezpena Gaztetxean
    KRONIKA
    Emanaldi beroa, horrela laburbil genezake emanaldiko giroa. Izerdi patsetan saioa hasi orduko eta aurrean belaunaldi ezberdinetako jendea aurrez aurre kantu berriak eta ez hain berriak entzuteko irrikaz. Hainbat unetan 80ko hamarkadaren amaieran geundela zirudien, Andoaingo Gaztetxe zaharrean Jingo de Lunch, Bap!! edota Radio Bemba ikusi genituenean bezalaxe. Aritz kantaria Gaztetxeko lehen lerroetan zegoen jendartera hurbiltzen zen bakoitzeko zinbuluka-zanbuluka zeramatzaten batetik bestera. Kontzertuaren amaiera aldera izerditan blai geunden, zaletu gehienak bezalatsu. Guretzat, bertan esan genuen, gogoangarria izan zen gaua. Hodei eta besteak fin aritu ziren lanean saioaren muntaketan, afariaren prestaketan eta ondorengo lanetan. Haiek bezalakoei esker egiten du aurrera musikak. Segi horrela! Itzultzeko gogoz agurtu ginen.
  • Adurtza, jaiak

    FITXA TEKNIKOA
    2008-07-19. Herria: Adurtza auzunea, Gasteiz
    Taldeak: deabruak teilatuetan + zea mays + beste bat
    Aipatzekoa: Herriko festak
    KRONIKA
    Bero ikaragarriarekin irten ginen "road to Gasteiz". Hiri handietan ohiko denez, auzuneetako jaietan kale bat mozten dute txosnak eta taulagaina bertan ipintzeko. Soinu froga amaitu eta berehala presoen aldeko ekitaldia burutu zen. Zea Maysen soinu froga hastearekin batera furgoneta hartu eta Langraitzetik gertu dagoen Zuhatzu-Kuartangoko igerilekura joan ginen senide eta lagun ditugun Olaia eta Jonerekin afaltzera. Giro ederrean aritu ginen, Arabako urteko ardoa eta Kakik oporralditik ekarri zuen bestea dastatuz. Gauerdia pasata, Adurtzara bertaratu ginen emanaldiarekin hasteko. Taldea zuzenean ikusteko gogoz zegoen entzulegoa aurkitu genuen parean eta horrek indarra eman zigun saioa hobeto burutzeko. Martxa hobea hartzen ari gara, hainbeste urte eta gero garai batean lortu genuen kimika hori berreskuratzen ari garela esan genezake. Gau polita izan zen, unean unekoaz gozatuz eta egun gutxitan egin behar ditugun saio guztiak egiteko gogoz.
    Goizaldera amaitu genuen. Azken garagardoa hartu eta Gasteizen geratu ziren lagunak agurtu ondoren Zuhatzu-Kuartangora itzuli ginen. Uda honetan Euskal Herrian barrena bazabiltza, ezagutu beharrekoa da Zuhatzuko igerilekua. Gu, bederen, itzuliko gara.

  • Berriz, Txosnak
    FITXA TEKNIKOA
    2008-06-28. Herria: Berriz, Bizkaia
    Taldeak: deabruak teilatuetan + zain + mafia
    Aipatzekoa: Herriko festak
    KRONIKA
    Ia ahaztuta genuen jaietan jotzea zer den. Larunbat arratsaldeko eguzki atseginarekin iritsi ginen Berrizko txosna-gunera. Eneritz Ene Badako kantari izandakoak eta Etxek egin ziguten ongi-etorria. Soinu-froga eta gero, herriko tabernetan ibili ginen garagardoa edanez. Tertulian. Kaki etorri zen gurekin teknikari lanetan eta beti badu kontatzeko zerbait. Solaskide hona izaten da ia beti.
    Bapo afaldu genuen eta lasai, oso lasai aritu ginen afalostean. Mafiaren saioa galdu genuen, lastima, baina Zain hasi orduko hantxe ginen, txosnetan. Txukuna Zainekoen proposamena. Gustura egon ginen euren kantuak entzuten.
    Segidan jo genuen gu. Oraindik taula gainekoa arrotza egiten zaigun arren, gero eta gehiago gozatzen ari gara zuzenekoetan. Eta hori islatu egiten dela uste dugu. Amaieran, Gorka BTX igo zen gurekin Peiremans+ taldearen bertsioa egitera. Plazer handia Gorka eta Berrizeko lagunak!

  • Durango, Plateruena
    FITXA TEKNIKOA
    • Data: 2008-05-24. Herria: Durango, Bizkaia
    • Taldeak: deabruak teilatuetan + zea mays
    • Aipatzekoa: Disko berrien aurkezpen kontzertua

    KRONIKA

    • 1973 diskoa aurkezteko bosgarren kontzertua. Herri Urratsen elkar agurtu genuenetik elkartzeko aukerarik ez eta Plateruenan jotzeko bildu ginen berriro. Diskoa grabatu aurretik Kafe antzokiko lagunak izan ziren deabruen asmo berrien jakiten lehenak. Zea Mays taldearen gonbidapena jaso genuen jaialdia elkarrekin egiteko eta une horretatik bertatik pozarren ginen. Bereziki gustuko dugun taldea delako Zea Mays, eta Plateruenan oso ondo hartu gaituztelako betidanik. Agertokira igo eta onena ematen saiatu ginen. Zer esanik ez dago emanaldia bezain gustukoa izan zela ondorengoa. Zerbezak ederto sartzen ziren, gainera presarik gabe genbiltzan bertan geratu ginelako lotan. Guretzat asteburu polita izan da. Emanaldiekin jarraitzeko gogoz gaude. Udaren zain...
  • Senpere, Herri Urrats
    FITXA TEKNIKOA
    • Data: 2008-05-11. Herria: Senpere, Lapurdi
    • Taldeak: deabruak teilatuetan + hainbat talde gune ezberdinetan
    • Aipatzekoa: Euskararen aldeko jaialdia

    KRONIKA

    • 1973 diskoa aurkezteko laugarren kontzertua. Iritsi eta berehala eskenatokia ikusi genuen. Bo! Ez zen gurea eta itzulinguru luze bat egin eta gero iritsi ginen Lapurdi gunera. Euritan gauzak taulagainera igotzen ari ginela, antolatzaileak saioa bertan behera uzteko pentsatzen ari ziren. Soinu froga eta emanaldiaren hasiera, biak batera egin genituen. Aterkiak, toallak, zuhaizpeak... jendea zain eta zalantzarik egin gabe aurrera egin genuen, baldintzarik egokienak ez baziren ere. Bezperako emanaldiarekin zerikusirik ez zuen izan, errepertorioa hankaz gora jarri genuen hasieratik! Jendea pilatzen joan zen eta horregatik eskerrona adierazi behar diogu eguraldiari aurre eginez aurrean izan genituen guztiei. Lokatzetan gauzak bildu eta etxerako bidea hartu genuen. Iñigok eta Enarak 500 kilometro zituzten aurretik! Asteburu ederra igarota agurtu genuen elkar.
  • Anoetako Gaztetxea
    FITXA TEKNIKOA
    • Data: 2008-05-10. Herria: Anoeta, Gipuzkoa
    • Taldeak: deabruak teilatuetan
    • Aipatzekoa: Emanaldia euskararen aldeko ekimena

    KRONIKA

    • 1973 diskoa aurkezteko hirugarren kontzertua eskerrona adierazteko modua izan zen. Anoetarrekin bereziki, musika lokaletan dabiltzan taldeekin. Izan ere, ezinbesteko laguntza eskaini ziguten disko berria eta zuzenekoak prestatzeko garaian.Goizetik gertu ginen taulagaineko prestaketa lanak egitera. Ima eta Joni Sartagudara (Nafarroa) memoria historikoaren aldeko ekitaldian parte hartzera zijoazen bitartean, Iñigok 500 kilometro egin zituen kotxean Anoetara iristeko. Zorionez, dena ondo irte n zen eta iluntzerako guztiok bat egin genuen gaztetxean. Kuku elkartean primeran afaldu genuen, iñigok eta imak kantu afari bilakatu zuten otordua! Giro ederrean jarraitu genuen Gaztetxean, eta oso atsegina izan zen ikusleen aurrean berriro aritzea. 22 kantu inguru eskaini genituen, entseatu gabe genituenak ere bai! Festa batean bilakatu zen kontzertuaren ondorengoa eta ordu txikitan bakoitza bere aldetik alde egin zuen, Senpere zain genuelarik.
  • Hatortxu Rock
    FITXA TEKNIKOA
    • Data: 2008-01-12. Herria: Berriobeiti, Nafarroa
    • Taldeak: deabruak teilatuetan + berri txarrak + kauta + narco + koma
    • Aipatzekoa: Presoen aldeko jaialdia

    KRONIKA

    • 1973 diskoa aurkezteko bigarren kontzertuan neurriak oso bestelakoak ziren. Milaka ikusleren aurrean, altuera nahiz zabalera handiko taula, watioak han eta hemen… esperientzia polita izan da berriro horrelako tamainako zuzenekoetan aritzea. Eskertu beharrean gaude Endika eta konpainiak eskainitako tratua. Uneoro maitatuak sentitu ginen eta emanaldi biziarekin erantzuten saiatu ginen. Loria jasoko ez duen bolondres eta teknikari askoren lanarekin aurrera ateratzen da Hatortxu Rock. Haientzat ere izan zen presoen alde idatzi genuen Zuentzat kantua. Ezin ahaztu ere Aitor, Rubio, Gorka, Karlos, Kaki, Fernan, Goiko eta lagunekin solasean emandako uneak… aukera berriak iritsiko dira udaberrian!
  • Bonberenea
    FITXA TEKNIKOA
    • Data: 2007-12-19. Herria: Tolosa, Gipuzkoa
    • Taldeak: deabruak teilatuetan + dj bull
    • Aipatzekoa: Bonberenearen X.urteurrena

    KRONIKA

    • Isilari iskin egin genion zuzeneko berragerpenarekin. Gure inguruko lagunen eta ezagunen aurrean nahiz Euskal Herri osotik etorritako deabruzaleen aurrean aritzea hunkigarria izan zen. Ahaztu ere egin genuen zuzeneko emanaldian Aritz edo Iñigo alboan izate hori. Sonorizazio aldetik ez genuen behar beste asmatu, nolanahi ere kantuak abesteko garaian entzuleengan laguntzaile  bikainak aurkitu genituen. DJ Bullek emanaldiaren ostean ipinitako musikarekin, kontzertua festa modukoan bilakatu zen goizalderarte. Bonbereneako lagun askotxo aritu ziren lanean jaialdia ondo atera zedin, ezin behar bezala eskertu egindako guztia. Rafa Gorrotxategik eginiko tarta mundiala zuentzat ere bada!